كل سنه و انتم طيبين عيدكم مبارك - لأ بلاش مبارك- خليها عيدكم كحك و مكسرات و كل الأكلات الحلوه اللى بتحبوها.
سبحان الله.. كانوا بيزغطونا زمان أكله واحده (اسمها فتة مبارك) ويقولولنا احمدوا ربنا أحسن لو راحت منكوا حتجوعوا..و يمكن تشحتوا كمان.
انما دلوقتى ..يا سلام على العز - لأبلاش عز- دلوقتى مش عارف اختار من كترة الأصناف فى المينيو بتاعة مرشحى الرئاسه.
فعلا لأن معظمهم لا أشك فى قدراتهم و نواياهم المخلصه.أنما أقولكم ايه .الواحد بقى نفسه فى كل الحاجات مره واحده.
لدرجة أن الواحد بقى ممكن يطمع أكتر ويتشرط ويطلب مشكل كمان يعنى طلب مخصوص بأكله جامده جدي يحط فيها الواحد كل اللى نفسه فيه.
يعنى مثلا نفسى فى رئيس له مرجعية اسلاميه يعنى بيعرف ربنا و يعرف أمانة المسئوليه ويعرف الحلال من الحرام.
وفى نفس الوقت يكون بيؤمن بحقى فى ابداء رأيي و الاختلاف معه يعنى يستحمل هو و اتباعه الانتقادات و الرأي الأخر بأعتبار ان معظم القرارات السياسيه ليها اكتر من بديل مش رأيه بس هو اللى نزل من السما عليه لوحده.
ويكون كمان له شعبيه نافذه مؤثره (مهمه مؤثره دي جدا .يعنى مش اغلبية اللى مش عارفين ايه شغلانة الريس أو ايه شغلانة عضو مجلس الشعب) لأن الشعبيه النافذه دى هى اللى حتخليه قوي فى أتخاذ القرارات الجريئه و فى مواجهة منتقديه وتمنع الفتنه جوه البلد.
و يكون كمان له قبول عند القوى الدوليه علشان ما نلاقيش نفسنا مره واحده فى وش الفلول التقيله اللى بره .
و نفسى كمان يكون متحمس ونشيط و ثوري الأفكار ويكون...و...لقيت الجرسون واقف مبحلقلى :تطلب ايه يافندم
قلت له : أدينى واحد سلفيبرالي من فضلك بس المهم بسرعه هه بسرعه.........خالد العاقل
